الشريف أحمد عبد الدايم صاحبي طلع كداب مصر

 

صاحبي طِلعْ كدّاب

خواطر أغاني الأسواني

الشريف_أحمدعبدالدايم

صاحبت صاحب وصاحبني

انا قلت ما نهدّش ..نبني

وكنت وقت الشدة معاه

والفرح لو  هو  طلبني

....**....**....**....**....

كانت الحياة إيزي وعادي

راضي بحياته وانا راضي

وكنّا اتنين والجيب واحد

  مليان يكُبّ عالفاضي

..**....**....**....**..

في الخير ياما كنت امشيلُه

كام مرة يوقع وانا اشيّلُه

ولو ناديت قُلت ياربي

أنا قبل نفسي  بدعيله

..**....**....**....**..

أكل معايا عيش  وملح

عشّنا الحُزن  ويّا الفرح

وعلشانه ياما زرعت الخير

عُمّري ما انتظرتْ الطرح

....**....**....**....**....

كان حبه في عروقي ودمي

وهمّه اشيّلُه قبل همّي

بعاملُه أكثر من صاحب

أخويا ما جبتهوش أُمي

....**....**....**....**....

   وكبرنا  والأيام  لفّتْ

زي قاعدة وسيجارة أتلفّتْ

وكل واحد  في طريقه

وبحور لُقانا كمان جفّتْ

....**....**....**....**....

صاحبي كِبرْ والله ادّاله

وهو صاحبه قاعد على حاله

أقول ناسيني ولا فاكرني

معقول ما جيّتِشْ على باله

....**....**....**....**....

ساعات بكوُن قاعد غفلان

والناس تقول دا صاحبه فُلان

    الكلمة كانت تسعدني

وأحسّ ضيوفه ضيوفي كمان

....**....**....**....**....

  ورحت أدُقْ على بابه

قالوا صاحبك كثير أصحابه

ده حتى أسمك ما فاكرهوش

  مفيش ميعاد مع جنابه

....**....**....**....**....

وبعيني شايفه ورا ستارة

أنا صاحبي مني بيتدارى

الدمعة نزلت من عيني

وقلت على الصُحبة خسارة

....**....**....**....**....

رجعت ورجليّا ما شيّلاني

الصدمة ثقيلة وشـلّاني

قادر كريم  يصلح حاله

   وربّك كبير يتولّاني