((( أخطر ملف فى مصر ))) لواء سامي دنيا

 

((( أخطر ملف فى مصر )))

وفي أخطر ملف في مصر

أخطر ملف هو مستقبل مصر...

التعليم..... التعليم هو اخطر ملف بيتعامل معاه عبدالفتاح السيسي ...

سنة ٢٠٢٠ كنت كتبت تقرير و كلمتكم فيه عن حلم عبدالفتاح السيسي لتغيير نظام التعليم في مصر...

وإن ده أخطر ملف من ملفات مستقبل مصر....

حقيقي الوزير السابق العظيم طارق شوقي كان بدأ الحلم وبدأ يغير نظام التعليم في مصر وبدأ بمدارس إسمها IPS

المدارس الرسمية الدولية.... الحكومية...

والوزير الحالي الدكتور رضا حجازي مكمل الحلم....

النهاردة بقا إتشرفت بدعوة لحضور حفلة نهاية الأنشطة لمدرسة IPS 2

فرع أكتوبر....

مهما أوصفلكم الإنبهار والعظمة اللي شوفتها ف أي بي إس ٢ فرع أكتوبر مش هقدر اوصف الطفرة العظيمة اللي بتحصل في التعليم والناس هتبتدي تشوف النتايج دي كمان عشر سنين لما يتم تعميم النظام على كل المدارس وعلى كل المحافظات....

لو لسه شايف إن التعليم ف مصر مفيش فيه فايدة....

ولو لسه شايف ان نظام التعليم فاشل في مصر يبقا لازم تشوف اللينك اللي تحت فالكومنتس...

شوف يا سيدي الوزير قالك مفيش فايدة ف النظام التعليمي اللي موجود في مصر اللي بقاله ٤٠ سنة  قايم على الغش والحفظ

قالك هنعمل إيه بقا....

 عمل نظام تعليم جديد بمناهج جديدة من اول الحضانة FS1 

طب وهو إيه النظام الجديد ده ....!!

دي مدارس مصرية حكومية  اسمها IPS 

يعني بالبلدي كدا اسمها المدارس الرسمية الدوليه

المدارس دي موجودة ف كل مدينة بس لسه منتشرتش اوي يعني ....

انما في كل مدينة في اتنين او تلاتة وكل سنة بيتبني مدارس اكتر

انما التعليم فيها مختلف جدا

بيتم اختيار الاطفال بأسلوب معين وبيتم تقييم مستواهم برضوا بشكل علمي

دا مش الاطفال وبس لااا دا كمان شرط قبول الطفل ان ابوه وامه يكونوا حاصلين على شهادة عليا علشان يقدروا يستوعبوا نظام التعليم الجديد..... 

ومفيش اي واسطة ف التقييم....

الفصل ف المدرسة العدد فيه مبيزدش عن ٢٥ طفل 

كمان الانشطة ف المدرسة ونظام التعليم حاجة فعلا في منتهى الروعة هتلاقوا لينكات ليها ف الكومنتس

كل فصل بيشرف عليه مدرس ومساعد مدرس وعلى تواصل مع امهات التلاميذ على الواتس...

ممنوع المدرس يمشي من المدرسة غير لما كل تلميذ يوصل بيته

كل مدرس بيبعت تقييم يومي واسبوعي وشهري للتلميذ على إيميل الاب او الام

خطة الدراسة بتتبعت اسبوعيا لكل ام على ايميلها ولازم تتابعها

كل طفل اول ما بيدخل المدرسة بيتعمله إيميل وبيتبعت عليه يوميا الواجب بتاعه

حقيقي انا إتشرفت وقابلت مدير المدرسة حد بروفيشنال جدا وشيك جدا ومثقف جدا لدرجة انك متصدقش انه مدير مدرسة حكومية لا دا مدير شركة مالتي انترناشيونال

المدرسين ف المدرسة بيتم إختيارهم بعناية شديدة جدا حسب كفاءتهم العلمية يعني مش بالواسطة

كمان اول مرة اشوف مدرسين ف مدرسة حكومية شكلهم حلو ولابسيين يونيفورم شيك جدا وريحتهم حلوه

كمان المدرس دوره مش بينتهي اول ما العيال تروح بيتهم...

 لا دا بيكمل معاهم عالنت وبيعملهم Zoom  وبيذاكر معاهم الواجب ف البيت عن طريق الفديو كول

يعني المدرس حرفيا شغال ٢٤ ساعة

ومدير المدرسة بيراقب كل دا لانه موجود في كل جروبات المدرسة اللي ع الواتس

انا بكلمكوا عن مدارس حكومية والله مش مدارس خاصة.... إشي خيال يا ولاد

عارفين....اول مرة ف حياتي أشوف اطفال مصريين بيعيطوا ف آخر يوم ف المدرسة علشان خلاص مش هيروحوا المدرسة وهياخدوا اجازة

حقيقي أنا معرفش ليه الإعلام المصري مبيتكلمش عن المشروع ده !!

يعني ليه الدنيا مقلوبة في السوشيال ميديا علشان خماشر قرش وسايبين العظمة اللي بتتعمل ف مصر

ادخلوا شوف حفلة تخرج التلاميذ ف مدرسة حكومية مش انترناشيونال

على فكرة انا مليش طفل فيها ولا ليا اي مصلحة عندهم  انا بس فرحانة ان في عظمة بتتعمل ف ملف التعليم ف مصر ومحدش حاسس بيها

علشان كدا كان عنده حق طارق شوقي لما قال ان في دول بتطلب من مصر تطبق عندهم تجربة مصر التعليمية وتاخد خبرات من مصر ...